Ezayi 53 : 5, 12b
« Men, se pou peche nou ki fè yo te mete san l deyò kon sa. Se akòz mechanste nou ki fè yo te kraze l anba kou kon sa. Chatiman ki ban nou lapè a se sou li li tonbe. Avèk tout kou li te resevwa yo, li ban nou gerizon. Paske se li menm menm ki te bay tèt li pou l mouri kon sa. Li te kite yo mete l ansanm ak kriminèl yo. Li pran plas anpil moun ki t ap fè sa ki mal. Li mande padon pou moun ki te fè mal yo. ».
Tit : « Yon delivrans total kapital ».
Si do lakay ou gen yon twou, epi li lakoz yon dlo sal ap plede tonbe nan kay la tout jounen, ki sa w ap fè ? W ap pran yon twal oubyen yon mòp pou w pase tout tan w ap seche dlo a, pandan w konnen chak fwa ou fin siye l, dlo sal la ap tonbe ankò, oubyen w ap pran desizyon pou w bouche twou a yon fwa pou tout pou dlo sal la sispann tonbe nan kay la ? Li klè, se dezyèm opsyon an w ap pran pou w pa lave men siye atè. Imaj sa a montre nou, nou gen yon reflèks gras ak entèlijans nou, lè nou devan yon pwoblèm, pou n fè sèten nou p ap jwenn li ankò, nou prefere ale nan rasin pwoblèm nan pou n rezoud li. Nan sa ki gen pou wè ak kondanasyon lòm lè yo te fin dezobeyi Bondye, yo te bezwen pwoblèm sa a rezoud nan sous li tou. Sakrifis moun te konn fè nan Ansyen Testaman an te tankou moun k ap siye dlo sal ak mòp nan kay la, men yo pa t ka monte sou do kay la pou bouche twou a yon fwa pou tout. Se pa t volonte yo te manke, men yo te sèlman pa t kapab. Sèl moun ki te ranpli kondisyon pou bouche twou peche a li rele Jezi. Lè Satan te tante Èv nan jaden an, tantasyon an te gen pou wè ak twa dimansyon ki gen nan lòm, sa vle di kò, nanm ak lespri, chak pati sa yo te kondane, alòs lè Kris vini, premye tès li a se te pou l te reyisi nan twa dimansyon tantasyon kote Èv ak Adan te echwe a, sa vle di nan kò, nanm ak lespri tou, sa Satan te fè ak Èv nan jaden an nan liv Jenèz 3, li t al eseye fè l ak Kris nan dezè a nan Matye 4. Nan tèks nou li jodi a, nou jwenn ki jan lanmò ak soufrans Kris la delivre chak dimansyon nan nou ki te kondane, sa vle di kò nou, nanm nou ak lespri nou, pou l te ka rezoud pwoblèm peche a yon fwa pou tout. Wi, sèl lanmò Kris la delivre kò nou, nanm nou ak lespri nou. Jezi te mouri pou chak dimansyon nan lèzòm pou l te ka ban nou yon delivrans total kapital. Nou pral gade enplikasyon ak rezilta delivrans pou chak pati nan nou Jezi te delivre lè l te mouri pou nou sou kwa a.
- Lanmò Kris la delivre kò nou (Ezayi 53 : 5,12)
« Men, se pou peche nou ki fè yo te mete san l deyò kon sa. Se akòz mechanste nou ki fè yo te kraze l anba kou kon sa. » Moso tèks sa a pale sou soufrans fizik Kris la te pran pou mwen ak ou, pou ki sa li te dwe soufri nan kò l ? Ebyen, se paske kò nou te kondane lè l te tonbe anba tantasyon Satan nan jaden Edèn nan. Jenèz 3 : 6 di nou kon sa: « Fanm nan gade, li wè jan fui yo sanble yo a bon nan bouch », se sa apot Jan rele konvwatiz lachè a nan 1 Jan 2 : 16,17, dimansyon tantasyon sa a se kò a li touche, li te mache ak yon kondanasyon paske Bondye te di Adan : « Depi w manje fui nan pyebwa konesans byen ak mal la, w ap mouri wèpawè ». Se sa ki fè, premye batay Jezi te fè avan menm li kòmanse ministè l, se pou l reyisi tantasyon kò a kote Adan ak Èv te echwe, paske lè Satan te vin tante Jezi nan dezè a, li te sèvi ak menm strateji a nan Matye 4 : « Apre sa, Jezi vin grangou.Lè sa a, Satan pwoche bò kote l pou sonde l. Li di l kon sa: Si ou se Pitit Bondye, bay wòch sa yo lòd pou yo tounen pen », sa ki se yon aspè nan tantasyon an ki touche dimansyon kò a, li te fè l pou Èv, li te vle fè l pou Jezi tou. Men, si premye Adan an te echwe sa ki te lakòz kò a te dwe peye konsekans soufrans ak lanmò, dezyèm e dènye Adan an te dwe reyisi, e li te reyisi, men konsekans reyisit la se te pou l te pran soufrans kò a ak chatiman lanmò nan plas mwen ak ou. Men tou, li enpòtan pou n gade ki jan kò a te ye avan peche, ki jan l vin ye aprè peche, e ki travay lanmò Kris la fè pou l korije sa, pou l fè l tounen jan l te ye a.
Avan Adan te peche, li te gen yon kò espesyal, yon kò Bondye te fè ak men pa l daprè sa Jenèz chapit 1 fè nou konnen. Nou kapab di kò sa a te san defo paske aprè chak bagay Bondye te fin fè, tèks la di « Bondye wè sa l te fè a te bon ». Mo ebre ki sèvi pou bon an vle di plizyè bagay, li vle di : yon bagay ki san defo, ki rich, ki gen anpil valè, ki agreyab epi ki bèl tou. Se lojik pou kò a te gen tout kalite sa yo paske moun ki te fè l la pa gen defo nan li menm, epi kò sa a li te kreye a pa t ka mouri tou paske lanmò pral vini kòm konsekans dezobeyisans yo pa rapò ak pinga Bondye te ba yo. Aprè peche, kò a vin pèdi kalite li te genyen yo : Maladi vin rann li fèb, frajil, tan an fè l pèdi bèlte l, epi peche vin lakoz li ka mouri. Apot Pòl sèvi ak mo « Corruptible » pou l pale sou kò a pou di li ka kòwonp, li ka pouri. Lè Kris te vin sou latè, doulè ak soufrans li te pran nan kò l yo, se pou l te ka fè kò a tounen jan l te ye a ankò lè nou va resisite. Li ban nou egzanp la paske li menm li te leve soti vivan nan lanmò ak yon kò glorifye. Kò glorifye sa a pa ka pouri, Pòl di l ap « Incorruptible ». Alòs, Kris te mouri pou l te ka elimine kondanayon kò nou te genyen an ki se lanmò. Epi li te resisite pou l ban nou garanti l ap resisite nou daprè sa l te di nan Jan 6 : 40 « Volonte papa m, se pou nenpòt moun ki wè Pitit la epi ki kwè nan li gen lavi ki p ap janm fini an ; epi m ap resisite l nan dènye jou a ». Epi pou l ban nou yon lòt garanti ki montre kò nou pa kondane ankò, li ban nou Sentespri a ki vin abite nan kò nou kòm yon gaj eritaj k ap tann nou an, nou jwenn sa nan Efezen 1 : 13,24. Mo gaj la vle di yon bagay ki gen valè yo bay kòm garanti yon dèt peye. Sonje kò nou te esklav peche paske se vye dezi ki t ap menmen l, Kris vini li libere kò nou anba pouvwa peche sa a, nou pa esklav ankò, se pou sa li deklare nan Jan 8 : 36 : « Si se Pitit la ki libere w, ou lib toutbon vre ». Lè Kò Kris te sou kwa a, se kò mwen menm ak ou ki te krisifye tou, se pou sa Pòl di nan Galat 2 :20 « Yo te krisifye m ansanm ak Kris la sou kwa a, si jodi a m ap viv se pa mwen k ap viv, men se Kris la k ap viv nan mwen », e sa se pawòl pou mwen ak ou ap repete chak jou.
Yo t ap kouri dèyè yon jèn gason ki te touye yon moun ak yon kout fè li te ba li nan tèt. Lè l rantre lakay li, li mande pou gran frè l la pa di si l la, lè gran frè a mande l sa k pase li eksplike l. Kòm moun yo te rive jwenn kay la, yo t ap frape nan pòt la pou yo rantre pran l epi touye l, gran frè a di l sonje m te toujou ap pale w de Jezi, m panse jodi a ou gen chans pou w fè sa. Li fè ti frè a ba l rad plen san ki te sou li a, li soti al jwenn moun yo deyò a, lè moun yo wè rad san an yo di: Se li menm, epi yo touye l ak kout manchèt, ak baton, ak wòch. Se sa Kris la te fè lè l te mouri sou kwa a, li te pran kou, pou mwen ak ou pa t pran kou, yo te pèse kòt li pou kòt mwen ak ou pa t pèse.
Piske lanmò Kris la sove kò nou, nou dwe kenbe kò nou pwòp, evite tout sa ki ka trennen nou nan peche fizik, paske kò nou se Tanp Sentespri ki abite nan nou daprè 1 Kor. 6 :19. Si yon aktivite kèlkonk soti pou l antrave kò nou, sonje yo te klouwe kò nou ak Kris sou kwa a. E moun ki poko asepte Kris, se pou w konnen gen yon moun ki te mouri pou kò peche ou genyen an, li fè pwovizyon pou l restore l, vini jwenn li jodi a menm.
Lanmò Kris la pa t delivre kò nou sèlman, li te delivre nanm nou tou.
- Lanmò Kris la delivre nanm nou (Ezayi 53 :5,12)
« Chatiman ki ban nou lapè a se sou li li tonbe ». Lapè sa a fè referans ak pati imateryèl lòm, nanm ak espri, paske pou w santi w byen nan kò w, nanm ou ak lespri w dwe trankil. Men petèt w ap di ki sa ki te deranje nou nan pwen pou nanm nou te twouble ? Ebyen, se paske nanm nou ak lespri nou te sibi konsekans peche a tou lè l te tonbe anba tantasyon Satan nan jaden Edèn nan tou. Ann gade nanm nan avan. Nanm nou se katye jeneral emosyon, se li ki pèmèt nou ri, kriye, fache, elatriye. Jezi te pale sou nanm li ki tris nan Matye 26 :38, li te di : « M santi nanm mwen tris pou m mouri ». Jenèz 3 : 6 di nou: « Fanm nan gade, li wè jan pyebwa a te bèl » dimansyon tantasyon sa a se nanm nan li touche. Se sa ki fè, lè nanm Adan ak Èv te peche, nanm yo te kondane pou yo konnen sa yo rele lanmò etènèl, pou rezon sa a, Jezi te dwe reyisi tantasyon ki tou touche dimansyon nanm li lè Satan te vin tante l nan dezè a ak menm strateji a nan Matye 4 : 8 : « Satan mennen Jezi ankò sou yon mòn ki byen wo. Li montre l tout wayòm ki sou latè ansanm ak tout richès yo ». Se sa Jan rele nan 1 Jan 2:16 “Ògèy lavi a”, nou gen lanvi gen bèl bagay.
Daprè sa Bib la anseye, vrè nou menm nan se nanm nou li ye, paske se li ki gen pou ale rejui ak Senyè a lè l tounen, se li menm tou ki gen pou ale boule nan letan dife ak souf la si nou pa asepte Jezi kòm sovè pèsonèl nou. Jezi pale sou nanm nan ki pral boule nan jeyèn nan Matye 10 :28. Se sa ki fè li te di nan Matye 16 :28, « ki sa sa ap sèvi yon nonm si l ta posede tout mond la epi pou l ta pèdi nanm li ». Alòs, lè lòm te peche nan jaden an, menm kote a nanm nan te kondane pou l ale boule nan letan dife souf la, sèl yon sovè te ka retire l anba chatiman sa a. Lè Jezi te sou kwa a, nanm li te pran soufrans tout limanite, imajine ki jan l te soufri. Dayè, se sa ki te pouse l di Bondye pou ki sa ou abandone m, paske se nanm nan ki ka konnen solitid, solitid nanm nou ta pral pase nan lanfè a, Jezi pran l sou kwa a pou nou yon fason pou nanm nou ka viv pou toutan ak Bondye. Chatiman ki ban nou lapè a, se sou Jezi li tonbe.
Menm jan Jezi te bay kò l pou sove kò nou, li te bay nam li tou nan plas nanm pa nou. Ann gade sa yon tikras pi fon. Mo biblik ki tradui “nanm” nan pasaj sa a se mo Ebre nefèch. Nanm nan toujou mache ak lavi. Literalman nephesh vle di “kreyati k ap respire”. Tout tan w ap respire, nanm ou toujou nan kò w, kidonk ou vivan. Nou wè sa tou nan Jenèz chapit 1, kote nou jwenn mo ebre nefèch la nan Vèsè 20 an pou “kreyati vivan”. Nan vèsè 21 an pou “tout bagay ki vivan ki kapab deplase” nan vèsè 24 la pou “kreyati ki vivan yo,” Epi nan vèsè 30 lan pou “tout sa k ap ranpe sou la tè, ki gen lavi ladan l”. Chak fwa mo nefèch la parèt nou wè li mache oubyen li fè referans ak lavi. Genyen yon koneksyon klè ant nanm ak lavi. Nan lang Grèk la, mo yo itilize pou “nanm nan” se psukè. Antanke Pitit lòm nan, men ki sa Jezi di nan Matye 20:28 “ Se kon sa, mwen menm, Moun Bondye voye nan lachè a, mwen pa vini pou moun rann mwen sèvis, men mwen vini pou m rann moun sèvis. Wi, mwen vin bay lavi m pou peye delivrans anpil moun.” Mo “lavi” Jezi sèvi ak li a se li ki vle di nanm, sa vle di Jezi di mwen vin bay nanm mwen pou nou. Kòm bon Bèje, Jezi te bay lavi li pou brebi a (Jan 10:14-18). La ankò, mo yo itilize pou lavi a se psukè, ki vle di nanm. Jezi te bay nanm Li, sa ki te pèmèt Li viv la, kòm yon pri pou peye peche nou yo.
Nan 1 Wa chapit 17, lè fanm nan te ale kote pwofèt Eli pou l di l pitit gason l la mouri, tèks la di Eli priye Bondye kon sa nan vèsè 21 an : Eli kouche twa fwa sou pitit la, li lapriyè. Li di: -Seyè, Bondye mwen, tanpri, fè nanm pitit la tounen sou li ankò». Tande ki sa vèsè 22 a di : Seyè a koute lapriyè Eli a, li fè nanm timoun nan tounen sou li, epi ti gason an tounen vivan ankò.
Nou menm ki sove deja, se pou nou viv nan yon lespri rekonesans paske nanm nou p ap janm konnen sa ki rele soufrans etènèl ankò. Nou menm k ap koute m ki poko fè lapè ak Jezi, konnen nanm nou kondane, se sèl Jezi ki ka sove l paske li te bay nanm li nan plas ou. Li te pran soufrans letan dife ak souf la pou ou, tout sa w gen pou w fè se viv jwenn li, aksepte sakrifis la pou nanm ou ka jwenn padon pou tout peche ou yo, pou nanm ou ka jwenn lapè l ap chache depi lontan an, yon lapè li p ap ka jwenn lòt kote, sinon nan Jezi sèl.
Lanmò Kris la pa t delivre kò ak nanm nou sèlman, li te delivre lespri nou tou.
- Lanmò Kris la sove lespri nou (Ezayi 53 : 5,12)
« Chatiman ki ban nou lapè a se sou li li tonbe » Jan nou te di l talè a, lapè sa a pale sou nanm nou ak lespri nou. Kounye a n ap konsidere lespri a. Kòman nou esplike lanmò Kris la sove lespri nou tou ? Ebyen, menm jan kò a ak nanm nan te tonbe anba tantasyon nan jaden edèn nan, lespri a te tonbe tou. Jenèz 3 : 6 di nou kon sa : « Fanm nan gade, li santi l ta manje nan fui a pou je l ka louvri », men nou abitye ak vèsyon ki di « pou louvri entèlijans li ». Dimansyon tantasyon sa a se lespri a li touche. Se sa ki fè, kote Adan ak Èv te echwe nan tantasyon ki te touche dimansyon lespri a, Jezi te dwe reyisi lè Satan te vin tante Jezi nan dezè a, li te sèvi ak menm strateji a nan Matye 4 : 8,9 : « Apre sa, dyab la mennen Jezi nan Jerizalèm, lavil Sent la, epi li mete l sou youn nan pwent ki pi wo nan tèt tanp la. Li di Jezi : Si ou se pitit Bondye toutbon vre, lage kò w anba, paske Bib la di : L ap bay zanj li yo lòd pou yo veye sou ou. Epi y ap pote w nan men yo, pou pye w pa frape nan wòch». Epi lè Satan te fin montre l wayòm latè ak tout bèl richès li yo, li di Jezi m ap ba w tout bagay sa yo si w mete ajenou nan pye m epi ou adore m. Lè l di Jezi lage kò l anba si l se Pitit Bondye, se pou l te ka touche ògèy Jezi sou moun li ye a.
Jezi te reyisi dimansyon tantasyon sa a se pou l te kapab retabli koneksyon spirityèl nou te pèdi nan Adan nan jaden Edèn nan, paske Bondye se lespri, se an espri ak nan verite pou nou adore l daprè sa Jezi fè nou konnen nan Jan chapit 4. Kontak sa a se tèlman koupe, Bondye te oblije mete yon sistèm sakrifisyèl sou pye, kote chak moun te gen ofrann pou w pote nan tanp la pou sakrifis peche, epi se sèl sakrifikatè prensipal la ki te gen dwa rantre kote ki sen anpil la. Men lè vwal tanp la te chire, li ban nou aksè ankò, sa vin fè kèlkeswa kote nou ye kounye a, kèlkeswa sa n ap fè, nou ka rantre an kontak ak papa nou ki nan syèl la nan non Jezi sovè nou an. Lespri nou ki te dekonekte ak li a tounen jwenn koneksyon an ankò
Nou konn ap gade yon fim fiksyon kote yo retire lespri aktè a sou li, sa vin fè li pa rekonèt ni madanm ak pitit li jiskaske yon kote nan fim nan li vin jwenn lespri l ankò. Ebyen lè nou separe ak Bondye, lespri ki pou ta fè nou rekonèt Bondye kòm papa nou an pa nan nou. Nou vin ap fonksyone tankou yon egare, Bondye devan nou, men nou pa ka rekonèt si se li menm ki papa nou. Men jou nou asepte Kris, li fè nou kado Lespri Bondye ki rann temwayaj nan lespri nou nou se pitit Bondye, epi kon sa nou ka rele Bondye « Papi ». (Women 8 :15,16)
Si jounen jodi a nou ka reyini nan yon espas pou n adore Bondye se paske Jezi te te pèmèt lespri nou rekonekte ak Bondye ankò. Sèl fason pou kominyon w retabli ak Bondye se asepte sakrifis Jezi te fè sou kwa a pou ou a, se kon sa Lespri Bondye ap fin abite nan ou. Bòn nouvèl la sèkè ou ka fè sa jodi a menm. E fason pou w pale ak Bondye ki nan syèl la, se an espri paske Bondye li menm se Espri. Èske w kapab ? Wi, Jezi te mouri pou sa. Èske w gen dwa ? Wi, Jezi fè pwovizyon pou sa.
DÈNYE KOZE
Lanmò Kris la delivre kò nou, paske li reyisi tantasyon kò a, li te soufri epi mouri nan plas nou, lanmò Kris la delivre nanm nou paske depi nou asepte l kòm sovè pèsonèl nou, nou chape anba kondanasyon Bondye a pou n ta ale boule nan letan dife ak souf la pou toutan, lanmò Kris la delivre lespri nou paske nou kapab rantre nan prezans Bondye an espri lè nou vle, epi Sentespri li mete nan nou an ka fè nou rekonèt li kòm papa nou. Lanmò Kris la, ban nou yon delivrans total kapital.
Men ki sa Wom. 5: 10 aprann nou: « Poutèt lè nou te lènmi Bondye, li menm li te rekonsilye nou avèk li pa mwayen lanmò Pitit li a, se yon rezon anplis pou nou gen garanti l ap sove nou pa mwaen lavi Pitit li a tou.
Nou p ap janm jwenn yon moun ki renmen nou tankou Jezi ki pou mouri pou nou, menm lè w ta jwenn youn, san l p ap janm gen menm valè pou l ta sove w. Nou nan yon mond ki frajil, chak jou moun ap mouri, pèsòn pa konnen ki lè jou pa yo a ap rive, pi bon chwa nou kapab fè, se asepte delivrans total kapital Jezi ban nou an gras ak sakrifis li sou kwa a. Sonje tèks jodi a : « Men, se pou peche nou ki fè yo te mete san l deyò kon sa. Se akòz mechanste nou ki fè yo te kraze l anba kou kon sa. Chatiman ki ban nou lapè a se sou li li tonbe ». Se pou Bondye fè nou gras pou n konprann epi pratike pawòl li, amèn !
-
Kote Bondye bay tout kretyen randevou
Bib la ban nou yon pwosesis pou n suiv yon fason pou n kapab byen grandi pou n rive nan matirite kote Bondye ap tann nou an. Nou kontan paske pwosesis pou matirite spirityèl nou pral pale a, li soti nan yon apot ki te fè anpil erè pandan l t ap mache ak Senyè a avan l te rive nan dènye mach la, se apot Pyè.
-
Fason Bondye vle nou bay
II Korentyen 9 : 7
« Se pou chak moun bay jan yo te deside nan kè yo, san moun pa fòse yo, san tristès, paske Bondye renmen moun ki bay ak kè kontan ».
Tit : « Bay pa sifi ».
Men ki sa Vòltè te di : « Relijyon an se yon kote yon bann mèddam reyini ki chaje enbesil k ap suiv yo ». Vòltè te gade sou yon pakèt vye pratik ki te gen nan legliz mwayenaj, nan 17èm syèk la kote responsab yo te konn ap vann sa yo rele endiljans la. Sa vle di ou te ka achte padon pou peche w ak lajan. Legliz nan epòk la te konn anseye ofrann nan se te yon mwayen pou retire yon nanm ki nan lanfè pou w fè l ale nan pigatwa, epi lè l soti nan pigatwa li ka ale nan paradi. Relijyon te mete yon pratik ki fè moun yo tankou bèt, yo te tounen zonbi nèt, tèlman yo te egare. Jounen jodi a, lè n ap gade ki jan anpil legliz chwazi pou fè ofrann, nou mande tèt nou èske l diferan ak jan yo te konn vann padon pou peche nan tan lontan jan nou sot di a ? Gen kèk lidè ki pwofite inyorans pèp Bondye a pou pouse yo bay sa yo pa posede. Genyen ki konn menm menase fidèl yo nan mande yo vide bous, valiz, pòch yo nan kòbèy ofrann la. Yo manipile moun yo san yo pa wont, yo sèvi ak inyorans moun yo pou yo mennen yo kote yo vle, pou yo fè yo aji kont volonte yo. Mete sou sa, yo kreye yon imaj Bondye nan lespri moun yo kote yo fè Bondye tounen yon koperativ, si w mete 10 pousan nan bank Bondye a, l ap ba w 100 pousan enterè. Nan nivo sa a, ofrann la pèdi tout sans li, li pa ofrann ankò, li tounen yon envestisman, « ban m m ap ba w », yo devlope rapò sa ak Bondye nan tout bagay, lè w ap chante yo di « Men louwanj ou ban m delivrans mwen nan pla men m », yo redui siyifikasyon ofrann la tankou yon komès relijye kote y ap pledi di plis ou bay se plis w ap beni, oubyen longè ofrann ou se longè benediksyon w.
Koute byen, tout sa w ap fòse fouye nan tèt yon moun ki pa mache ak verite biblik la ap gen yon enpak sikolojik sou moun nan kanmèm paske se sou baz yon vye ideyoloji sa w ap fòse a kanpe.
Tewolojyen epi jesyonè kontab Faldor Jean Rony kalifye pwoblèm “eco-tewolojik”, sa vle di li gen rapò ak yon pwoblèm tewoloji enviwònman», paske daprè li menm, dirijan sa yo pa konnen kretyen yo dwe gen yon bon relasyon ak anviwònman yo, nan sans, yo pa ta dwe yon menas oubyen predatè pou fidèl yo, men yon gid pou di yo ki atitid yo ta dwe genyen nan tout sikonsans sitou anndan legliz la. Feblès sa fè yo vale yon tewoloji pwosperite san yo pa konnen ni sa l ye ni nan ki kontèks li te pran nesans epi grandi. »
Ki sa Bib la di nou sou sa ? Pwoblèm lakòlèt sa a oubyen ofrann nan se te youn nan kastèt chinwa Pòl te gen pou l rezoud nan dezyèm lèt li te ekri pou Korentyen yo. Ki sa Senyè a vle nou konnen sou konpòtman nou dwe genyen lè nou ap pote ofrann pou li nan prezans li ? Èske nou dwe santi nou deranje pandan n ap bay ofrann nan ? Koute byen « Bondye plis enterese nan fason w ap bay la pase sa w ap bay la. Wi, Bondye plis enterese nan fason w ap bay la pase sa w ap bay la. » Tèks nou li jodi a ban nou twa verite nou pral gade kounye a : Ou pa dwe bay yon ofrann nan fòse ; Ou pa dwe bay ofrann nan tristès ; Ou dwe bay yon ofrann ak kè kontan, oubyen ak lajwa. Ann konsidere yo youn aprè lòt frè m ak sè m yo.
- Ou pa dwe bay yon ofrann nan fòse (II Kor. 9 : 7)
Mo fòse an kreyòl la, se li menm nou jwenn pou tradiksyon nan plizyè tradiksyon franse nou abitye ak yo ki se « kontrent » la. Nan yon fason jeneral, yo defini kontrent la tankou yon vyolans ou fè sou yon moun, se sa ki fòse a ; se lè w anpeche yon moun aji ak pwòp libète pa l. Kontrent sa a ka soti deyò, sa vle di kote yon lòt moun oubyen yon lòt bagay, oubyen li ka soti anndan moun nan menm. Lè nou di anndan moun nan, li ka yon baryè sikolijik, sa vle di moun nan gen yon bagay nan li ki jennen l epi anpeche l aji jan l ta swete a. Nan kèk domèn, yo konn pale sou baryè kiltirèl, sa vle di peyi oubyen kilti kote moun nan ap viv la konn anpeche l aji nan yon fason oubyen yon lòt, yo pale tou sou baryè sosyal, moral epi fizik. Nan sa ki gen pou wè ak tèks n ap gade jodi a, kontrent la se lè ou fòse yon moun bay yon ofrann san l pa t gen volonte pou l te fè sa. Yo konn fè sa yo rele vyolans vèbal sou moun yo, sa vle di ak pawòl k ap soti nan bouch yo, yo pouse moun nan depoze yon ofrann nan kòbèy la li pa t vle bay. Se definisyon sa a ki bay mo « regrèt » la tout sans li, paske men ki sa regrèt la vle di : « Se lè ou chagren, se lè ou repanti pou yon bagay ou te fè oubyen ou pa t fè. Nan sans sa a, li nòmal pou w regrèt ou te bay yon ofrann si se fòse yo te fòse w bay ofrann sa a.
Anpil moun mal konprann epizòd Abraram ak sakrifis pitit li Izarak li ta pral bay Bondye a, yo di se yon ofrann li ta pral fè anba gwo kontrent paske pa gen yon papa ki t ap dakò touye yon pitit li renmen anpil san sa pa deranje l. An nou gade nan Jenèz 22 lide k ap soti nan istwa sa a, vèsè 2 : « Bondye di Abraram : Pran grenn pitit gasou ou genyen an, sa w renmen anpil la, Izarak, ale nan peyi Morija, lè w rive la, w ap touye l epi w ap boule l nèt pou mwen sou youn nan montay mwen va di w yo ». Sa nou di ? Ki paran zantray la pa t ap rache lè l tande yon pawòl kon sa ? Donk, moun ki di se te yon ofrann ki te gen gwo kontrent ladan l sanble gen rezon, men atansyon, vèsè premye nan menm chapit la retire tout dout, koute sa l di : « Aprè tout bagay sa yo, Bondye sonde Abraram epi li di l : Abraram ! Epi Abraram reponn : Mwen mwen !» Bondye sonde Abraram. Gen tradiksyon ki di « Aprè bagay sa yo, Bondye pase Abraram yon tès », alòs, sa pa gen rapò ditou ak yon ofrann anba kontrent, men pito Bondye t ap pase lafwa Abraram anba eprèv, se te objektif egzèsis la. Dayè, mo ebre ki nan tèks orijinal la se « Nisah », ki vle di « epwouve » oubyen « fè yon moun pase yon eprèv oubyen yon egzamen ». Anplis Bondye te vle bay Abraram yon leson, men li te vle anseye nou yon bagay tou sou sakrifis Kris la ki te gen pou l vini, paske Morija, kote Bondye te di Abraram ale pou ofri grenn pitit li a an sakrifis, se menm kote sa a ki ta pral vin tounen Mòn Kalvè pita nan 2 Kwon. 31, mòm kalvè, kote Bondye ta pral ofri grenn Pitit li a an sakrifis. Bondye t ap teste lafwa Abraram, se pa t yon sakrifis anba kontrent, se pa t yon sakrifis ki te gen gou regrèt ladan. Dayè, pou montre w tèlman se te yon tès, Bondye te gen tan prepare yon belye pou pran plas Izarak, se la nou jwenn non « Yaweh Jireh », « le Dieu qui pourvoit »Bondye pwovizyon an. Sa enteresan pou n wè menm Bondye ki mande nou ofrann nan, se li menm ankò ki ban moun mwayen pou n ba l ofrann nan.
M gen yon zanmi ki rakonte m istwa yon jèn fi ki ale nan yon sèvis nan yon legliz yon jou nan semèn nan, epi pandan y ap fè ofrann, pastè a ap fòse moun yo depoze tout kòb yo gen sou yo nan kòbèy la menm lajan pou yo pran machin pou yo tounen lakay yo. Lè yo fenk kòmanse li t ap ezite, men lè l wè jan pastè a ap fòse moun yo, li leve depoze kòb yon lane inivèsite nan kòbèy la ak yon kè sere, yon kòb li te dwe al bay nan inivèsite a menm jou a, yon bò frè l ki te ba l kòb la pou l ale peye. M panse nou dwe rele yon chat, yon chat, sa rele vòlè. Se sa ki rele kontrent la, lè w fòse moun nan bay, lè sa a l ap regrèt kanmèm.
Frè ak sè m yo, si w santi lespri w pa dispoze pou bay, si yon moun ap fòse w vide pòch ou, bous ak valiz ou, se pou w reziste paske menm lè w ta bay tout sa w gen sou ou, Bondye p ap pran plezi nan ofrann nan paske se atitid ou Bondye ap chache, se dispozisyon kè moun k ap bay la ki enterese Bondye avan tout bagay. Sa vle di, avan w pote ofrann nan, se kè w ou dwe ofri bay Bondye. Nou menm dirijan, sispann fè vyolans sou pèp Bondye a, sispann fòse yo bay, nou se premye gwoup moun ki dwe respekte sa ki ekri nan Pawòl Bondye : Jan moun nan te deside nan kè l, san fòse, oubyen san kontrent.
Tèks la pa kanpe la, paske anplis li di ou pa dwe bay yon ofrann nan fòse epi pou w regrèt, oubyen anba kontrent, li di tou, ou pa dwe bay yon ofrann nan tristès.
- Ou pa dwe bay yon ofrann la nan tristès (II Kor. 9 : 7)
Gade ki jan yo defini tristès : « Yon fason ou santi w ki twouble emosyon w epi ki dire ; yon doulè ki anvayi konsyans ou epi ki anpeche w pwofite bagay ki ta dwe fè w kontan a ». Nou tande byen ? Yon fason ou santi w ki twouble emosyon w epi ki dire», onètman m panse nou te ka kanpe la paske definisyon an di tout bagay. Èske se ak yon santiman latwoublay nou dwe prezante nou devan Bondye lè n ap pote ofrann pou li ? Se santiman latwoublay sa a jenòm rich ki te mande Jezi ki sa pou l fè pou l gen lavi etènèl la te genyen. Jezi te reponn li : « Ou pa dwe touye ; Ou pa dwe fè adiltè ; Ou pa dwe bay manti ; onore papa w ak manman w ; epi se pou w renmen pwochen w menm jan ak tèt ou ». Jenòm nan te di Jezi : « Mwen fè tout bagay sa yo deja, ki sa m dwe fè ankò ? Jezi di l : « Si w vle san defo nèt, ale epi vann tout sa w posede, epi bay pòv yo, epi ou va gen yon trezò nan syèl la. Aprè sa, tounen epi suiv mwen. » Men pati ki enterese nou an : « Lè l fin tande tout pawòl sa yo, jenòm nan ale tou tris, paske li te gen anpil byen ». Nou jwenn istwa sa a nan Matye chapit 19 vèsè 16 a 22. Li te panike lè l tande li dwe al vann tout byen l yo, yon santiman latwoublay te pran l, e se definisyon tristès la menm, se kon sa anndan nou ye lè n ap ofri Bondye yon bagay nan tristès. Jan Bib la aprann nou l, Bondye pa pran plezi nan kalite ofrann sa yo, se atitid la l ap chache avan.
Istwa Kayen ak Abèl la ka ban nou yon limyè anplis sou sa n ap pale a, paske li montre nou atitid 2 frè ki t ap prezante ofrann yo bay Bondye. Jenèz 4 : 4b à 7 : « Letènèl te kontan ak Abèl epi li te aksepte ofrann li an, men li pa t kontan ak Kayen epi li pa t aksepte ofrann li an. Lè Kayen wè sa, li te move anpil, li mare figi l byen mare. Letènèl di Kayen : « Pou ki sa ou move kon sa ? Pou ki sa ou mare figi w kon sa ? Koute rezon ki fè Bondye pa t aksepte ofrann nan daprè vèsè 7 la : « Pa gen dout nan sa, si sa w te fè a te byen, ou pa t ap rive nan sitiyasyon sa a, men paske ou fè sa ki mal, peche a kouche nan papòt ou, l ap tann lè pou l pran tèt ou. Men ou menm, se pou w kenbe tèt ak li. » Gen moun ki di tèks la pa fin klè nèt sou rezon ki fè Bondye pa t aksepte ofrann Kayen an, kèlkeswa rezon an, Kayen pa t anpè avèk tèt li avan l te prezante ofrann nan, pa t anpè a vle di li gen yon santiman latwoublay. Sa pa gen anyen pou wè ak ofrann li te bay la ki se fui latè, chak moun te gen metye pa yo, Kayen se latè li te konn travay. Nan liv Penntatek yo, nou wè plizyè kote Bondye te konn aksepte pèp ofrann fui latè nan men pèp li a. Men tèks la di nou Kayen te mare figi l byen mare, nanm li pa t anpè, li te tris kanmèm. Se atitid li te genyen an ki fè Bondye pa t aksepte ofrann li an. Yon lòt fwa ankò, Bib la montre nou aklè atitid moun k ap bay ofrann nan vin avan ofrann la nan li menm.
Gen moun ki mal sèvi ak egzanp David la nan echanj li te genyen ak Ònan an lè l te vle achte chan an pou l bati yon otèl pou l fè sakrifis pou Bondye. Yo sèvi ak pasaj sa a pou di lè w ap ofri Bondye yon bagay fòk li deranje w, fòk li fè w mal, mo yo sèvi yo gen menm sans ak « fòk li ba w yon santiman latwoublay », sa vle di yon doulè ki anvayi konsyans ou epi ki anpeche w pwofite bagay ki ta dwe fè w kontan ». Ònan te di wa a l ap fè l kado, men David te reponn : Non ! Mwen vle achte l ak lajan nan men, mwen p ap ofri Senyè a yon bagay ki pou ou, epi mwen p ap ofri yon sakrifis boule bay Senyè a ki pa koute m anyen ». I Kwonik 21 : 24.
Atansyon ! Atansyon ! Aksyon David te poze a pa t vle di ofrann la te deranje l oubyen li te kite yon santiman latwoublay nan li menm, rezon an se paske anplis se te desizyon pèsonèl David pou l te achte l ak lajan men tou, David se wa li te ye, li te gen mwayen pou l achte cham an san sa pa t deranje l, sa vle di se ak bon volonte l li te fè l, daprè jan nou te li l nan tèks jodi a : jan li te deside sa nan kè l ».
Frè ak sè m yo, si nou gen 100 goud nan pòch nou, epi nou santi nou tris pandan n ap depoze l nan kòbèy la nan moman ofrann la, kenbe lajan w nan pòch ou, Bondye pa pran plezi nan sa. Menm yon zanmi ou vle fè yon kado si w santi tristès nan kè w, kenbe kado w lakay ou, paske tèks la klè devan nou : « ….se pou w bay san tristès, jan ou te deside fè sa nan kè w ».
Ou pa dwe bay yon ofrann nan fòse epi pou w regrèt, ou pa dwe bay yon ofrann nan tristès, men ou dwe bay yon ofrann nan kè kontan, oubyen nan lajwa.
- Ou dwe bay ofrann la nan kè kontan oubyen nan lajwa (II Kor. 9 : 7)
Yo defini « kè kontan » an tankou yon bon emosyon ou genyen ki soti anndan fon kè w, yon santiman tout konsyans ou santi. Toujou daprè definisyon sa a, emosyon sa a mache ak yon bagay, sa vle di gen yon rezon ki ba w kè kontan sa a. Si se kon sa, kè kontan nou genyen an se yon manifestasyon rekonesans pou sa Bondye fè pou nou. Nou prezante ofrann nou yo bay Bondye paske nou renmen li, paske li ban nou tout sa nou bezwen avan menm nou mande l yo. Li enteresan pou n gade tou « kè kontan » n ap pale a oubyen « lajwa » se fui Lespri a li ye, nou jwenn li nan Galat 2 :20 : « Fui Lespri a se kè kontan….. ». Sa fè nou konprann moun k ap prezante ofrann nan dwe fè l selon Lespri, epi kèlkeswa kote Lespri Senyè a ye gen kè kontan, alòs, se yon ofrann ki jwenn enspirasyon l nan Sentespri nou dwe pote bay Bondye, li soti anndan fon kè nou, li pa gen limit. Sentespri vle mete nou nan bon kondisyon emosyonèl, sikolojik ak spirityèl pou n prezante ofrann nou devan Bondye.
Lè nou gen kè kontan, nou bay san gade dèyè, nou bay ak liberalite, e se menm liberalite sa a k ap fè nou rich, se sa menm nou jwenn nan Pwovèb 11 :24 : « Moun ki bay san gade dèyè ap vin pi rich ».
Jezi t ap pale sou pòv vèv ki te bay 2 ti pyès yo, li te di fanm sa a te bay plis pase tout lòt moun ki t ap mete nan bwat la ; paske yo menm yo te bay nan sa yo pa bezwen ankò, men vèv la te bay sa l te genyen pou l te viv, tout sa l te posede. (Mak 12 : 42-44). « Tout sa l te posede » se sa liberalite a ye, e pa gen liberalite san kè kontan, se kè kontan an menm k ap fè w baya k liberalite, sa vle di san gade dèyè. Men atansyon ! Jezi pa vle di liberalite a se lè w bay tout sa w genyen epi ou pa kite anyen pou w viv, men pito, li t ap anseye disip yo epi nou menm sou ki atitid nou dwe genyen lè n ap bay, paske li di « lòt moun yo bay nan sa yo gen anplis, nan bagay yo pa bezwen », poutan vèv la te bay tout sa l te genyen, sa ki te nesesè pou l viv, alòs bon jan ofrann nan se lè w ba w san w pa fèmen kè w, san w pa mezire, se lè ou bay tout ou menm san rezèv. Pandan n ap pale sou « bay tout ou menm » nan, koute sa Pòl te di sou legliz ki te nan Masedwàn yo : « Frè m yo, mwen ta renmen fè nou konnen jan Bondye te montre favè l nan legliz Masedwàn yo. Nan mitan gwo tribilasyon ki te pase yo anba eprèv, malgre yo pa t genyen, kè kontan yo a te fè yo bay san gade dèyè. Sa m ap di nou la se vre, yo bay tout sa yo te kapab, yo menm rive bay sa yo pa menm genyen san moun pa fòse yo, pandan y ap fè sa, y ap plede ak nou pou n aksepte paske yo di se yon privilèj yo genyen pou patisipe nan sekou y ap voye pou manm pèp Bondye a ki nan peyi Jide. Anplis yo bay jan nou te swete l la, yo ofri pwòp tèt yo bay Senyè a avan, aprè sa yo ofri tèt yo ban nou tou jan Bondye vle l la ». II Kor. 8 : 1-5. Ki sa pou n di ankò ? Se sa vrè ofrann la ye menm.
Bay ak kè kontan sanble ak yon timoun ki gen yon bèl mango byen jòn nan men l pou l manje, epi li wè papa l k ap vini byen lwen nan yon vwayaj li te pase plizyè jou deyò. Li tèlman kontan paske li pral pase tan ak papa l, li bliye si l grangou epi li lonje mango a bay papa l pou l montre l jan l kontan. Se menm jan an tou, lè nou nan prezans Senyè a, kè kontan nou jwenn nan pouse nou ofri l sa nou genyen ki pi bon an san fòse, nan lajwa.
Mwen konnen li pa fasil pou n jwenn anpil legliz jounen jodi a nan kote n ap viv la kote moun yo bay ofrann ki pa lajan, men kite m di nou, si se yon chan bannann ou genyen epi w santi nesesite pou w pote yon rejim kòm ofrann pou Bondye, fè sa san ezite, pa okipe moun, sa regade ou menm ak Senyè w la sèlman. Si w vle vann li tou pou w pote kòb la vini, pa gen pwoblèm, men sonje ou dwe fè sa nan kè kontan, pa okipe ipokrizi pèsòn aji sou ofrann ou an.
DÈNYE KOZE
Bon jan ofrann la se lè nou bay san nou pa regrèt la, san yo pa fòse nou ; Bon jan ofrann ofrann la se lè nou bay san tristès ; Bon jan ofrann la se lè nou baya k kè kontan, oubyen nan lajwa. Verite sa a dwe rantre anndan fon kè nou si n vle evite fè kòve. Paske anpil fwa ofrann nou yo sanble ak kakav ki byen abitye men yo pa gen souf nan yo, se diferans sa a menm ki gen ant yon moun k ap viv ak yon moun ki mouri « souf la ». Si nou pa bay ofrann nou yo ak kè kontan, yo p ap gen « souf nan » yo tou, sa vle di yo p ap vivan devan Senyè a.
Bib la ban nou yon egzanp sou yon koupe ki te prezante ofrann ni ak regrè epi nan tristès tou. Aprè yo te fin vann yon teren, Ananyas ak Safira te bay manti paske yo te kenbe yon pati nan lajan an pou yo epi yo di se tout lajan an yo te pote. Petèt se paske yo te wè lajan an te twò bèl devan je yo, oubyen yo te vle fè wè. Poutan, yo te lib pou yo te bay kantite yo vle e pèsòn pa t ap di yo anyen, daprè sa Pyè te di yo nan Travay chapit 5. Yo te regrèt lajan an. Menm jan yo te ofri yon ofrann kadav, sa vle di kip a t gen kè kontan ladan, kò yo te tonbe sans ouf devan apot yo tou. Se ak sa ofrann nou yo sanble lè nou pa bay yo ak kè kontan, yo sanble ak kadav devan Bondye. Ki sa pou Senyè a fè ak yon kadav ? Se pa kwòk mò li ye.
Pi gwo ofrann nou ka bay Bondye se lavi nèt, san manke moso. Si vi nou pa vo anyen pou nou nan pwen pou nou bay Bondye tout, ki sa nou p ap ba li ? Nou konnen ki jan nou sansib pou lavi nou. Lè nou ba l lavi nou nan kè kontan, li gen yon fason li resevwa pafen ofrann sa a devan twòn li. Ou menm ki poko resevwa Jezi nan lavi w, pi gwo ofrann ou ka ba li se lavi w kòm repons pou sakrifis li te fè pou ou sou kwa a, li ba w garanti ofrann sa ap gen yon bon sant nan prezans li pou tout letènite. Men sonje, kèlkeswa sa w ap bay la se pou w bay li ak kè kontan, paske kè kontan an se luil ki sou ofrann nan k ap rale dife Sentespri pou boule ofrann nan, sa ki montre Bondye aksepte l. Se pou Bondye fè nou gras pou n konprann epi pratike pawòl li, amèn !
-
Tout pou li anyen pou nou
Paske se Bondye ki kreye tout bagay, tout bagay se pou li. Paske se Bondye ki te rachte nou, tout bagay tounen pou li ankò, paske li te peye yon gwo pri pou nanm noua k san Pitit li Jezi ki te koule