II Pyè 1 : 5b rive 8
« …nou dwe fè tout sa nou kapab pou nou mete sou lafwa nou bon konduit, sou bon konduit la n ap mete konesans, sou konesans la n ap mete kontwòl tèt nou, sou kontwòl tèt nou n ap mete pasyans, sou pasyans la n ap mete devosyon oubyen sèvis nou pou Bondye, sou sèvis nou pou Bondye n ap mete lanmou pou frè ak sè nou yo, sou lanmou pou frè ak sè nou yo n ap mete lacharite. Si nou gen tout bagay sa yo nan nou, si nou devlope yo nan nou, yo p ap kite nou ni rete bra kwaze ni san pou pa pwodui pou konesans Senyè nou an Jezi Kris.»
Matirite spirityèl : Kote Bondye bay tout kretyen randevou
Lè yon ti bebe fèt, li bezwen lèt manman l ki gen tout sa l bezwen pou l viv, men plis l ap grandi, li bezwen jwenn bon jan manje solid pou l ka pi byen devlope. Ebyen, moun ki fenk fèt nan Kris yo bezwen lèt tou, sa vle di bon jan nosyon fondamantal nan doktrin kretyèn nan, men pou yo grandi spirityèlman, yo bezwen bon jan manje solid. Bib la ban nou yon pwosesis pou n suiv yon fason pou n kapab byen grandi pou n rive nan matirite kote Bondye ap tann nou an. Nou kontan paske pwosesis pou matirite spirityèl nou pral pale a, li soti nan yon apot ki te fè anpil erè pandan l t ap mache ak Senyè a avan l te rive nan dènye mach la, se apot Pyè. Pou chak etap li montre nou nan vèsè jodi a, nou pral eseye gade siyifikasyon yo, koneksyon yo genyen nan mitan, gade ki jan kèk apot te aplike yo nan lavi yo epi ki jan nou menm jodi a nou ka aplike yo nan lavi nou.
Nan yon sans jeneral, Pyè te voye lèt sa a pou tout moun ki ta pataje menm lafwa ak li, pa mwayen jistis Bondye ak Sovè Jezi Kris (V. 1). Sa fè nou kapab di san doute, tout rekòmandasyon ki nan tèks jodi a yo pou nou tou paske nosyon kwasans spirityèl la pa konsène yon gwoup kretyen sèlman ki te viv nan yon epòk, men pou tout moun ki mete konfyans yo nan Jezi pou Senyè ak Sovè pèsonèl yo. Paske, matirite spirityèl la, se kote Bondye bay tout kretyen randevou. Apot la prezante nou devlopman vi kretyen ki pou mennen nou nan matirite a tankou yon eskalye ki gen 8 mach ladan, nou pral gade yo youn aprè lòt.
Tewolojyen evanjelik yo kwè nan enspirasyon total, mo pou mo Bib la, se sa yo rele an frase : « Inspiration verbale et plénière ». Nan liv li ekri ki rele « Introduction à la théologie », doktè Joël Laloi defini l kon sa : Sentespri Bondye a pran kontwòl panse otè biblik yo pou l gide yo menm nan chwa mo y ap fè pandan l kite yo chak la ak pwòp stil pa yo. Se sou baz 2 Pyè. 1 : 21 yo tire definisyon sa a kote tèks la eksplike wòl Sentespri nan redaksyon Bib la. Alòs, nou kwè se pa yon aza si se kon sa mach ki menmen nan matirite spirityèl ranje. Jan n te di a, an n gade yo youn aprè lòt, menm si gen kèk k ap mande plis tan pase lòt.
- Lafwa (II Pyè. 1 : 5b)
Eksplikasyon : Premye mach la se lafwa. Sa parèt lojik paske lè nou li nan Ebre 11 : 6b, men sa nou jwenn : « Se sa k fè, nenpòt moun ki vle vin jwenn Bondye dwe kwè Bondye egziste epi Bondye rekonpanse moun k ap chache l ak tout kè yo. » Vèsè a gen tout sans li paske ou pa ka pwoche bò kote yon èt siprèm san w pa menm kwè li egziste. Kounye a, nou pral fè de konsiderasyon sou lafwa : Nou pral gade ki kote li soti epi ki sa li vle di tout bon vre. Bib la klè kou dlo kòk sou ki kote lafwa soti. Women 10 :17 di nou « lafwa vini lè nou tande Bòn nouvèl la, epi nou tande Bòn nouvèl la lè yon moun pale sou sou Kris la ». Epi, se pa mwayen lafwa ki fè nou sove, daprè Efezyen 2 :8.
Kounye a, yon vye konsepsyon sou lafwa ka fè nou parese, li ka fè nou fè wout kwochi jis malè rive nou. Paske lafwa se pa sèlman yon konfyans ou mete nan yon moun oubyen yon bagay, sa ki se yon eleman nan lafwa a, men pou li konplè nèt, ou dwe poze aksyon ki mache oubyen ki koresponn ak sa ou kwè a. Si nou kwè Jezi ka sove nou anba peche nou, lafwa sa a kòrèk, men li poko konplè toutotan nou pa poze aksyon an pou nou ale jwenn Kris, konfese peche nou yo, envite l nan lavi nou ofisyèlman pou l vin Senyè nou. Se nan nans sa a ki fè Jak di yon lafwa ki pa gen bon jan aksyon oubyen zèv ki mache ak li, se yon lafwa ki mouri.
Se sa ki fè lafwa n ap pale a diferan ak yon fwa sipèfisyèl, paske Bib la di menm demon yo kwè Bondye egziste tou, men yo tranble, nou jwenn sa nan Jak 2 :19.
Istwa fanm ki t ap pèdi san depi douz lane nan Matye 9 : 20-22 a, ban nou yon definisyon ki kòrèk sou lafwa. Fanm nan te di nan li menm : « Si m ka rive touche wòb Jezi sèlman, m ap geri ». Fwa sa a kòrèk, paske pèsòn pa pi byen plase pase Jezi pou geri tout maladi nou yo. Men si aprè fanm nan te fin fè deklarasyon an epi li te rete chita lakay li, li pa t ap janm geri. Fòk li te atake dezyèm eleman nan definisyon lafwa a ki se aksyon ki mache ak sa l kwè a. Tèks la di nou, li leve, li pase nan mitan foul la epi li touche ke wòch Jezi. An n fè yon ti kanpe la. Levitik 15 : 25 fè nou konnen « yon fanm ki gen san k ap koule sou li pandan plizyè jou ki depase peryòd nòmal li, pa pwòp padan tout peryòd li gens an an ». Pa pwòp la vle di li « impur », tèks la di yo dwe mete moun kon sa an karantèn pou moun pa touche ak li, paske depi yon moun touche fanm sa a oubyen yon bagay fanm sa a te touche deja, moun sa a ap « impur » tou jis nan aswè, li ka menm mouri si l pwoche nan eta l ye a bò kote tabènak la ki nan mitan pèp la (v. 31). Alòs, lafwa fanm sa a pouse l kite karantèn nan, se te yon risk ki te ka koute l lavi l, li pase nan mitan foul la, sa vle di li kraze baryè sosyal epi sikolojik la jiskaske li touche wòb Jezi. Lafwa l la te chita sou Jezi, sa vle di li te kòrèk, epi li poze aksyon ki mache ak sa li kwè a.
Kounye a, jan n te di n ap fè l la, an n gade ki jan lafwa sa a te manifeste nan lavi apot yo, espesyalman nan lavi Pyè. Depi premye fwa Pyè te rankontre ak Jezi nan Lik 5 :4 à 6, nou jwenn definisyon lafwa a. Jezi mande mesye yo lage filè yo nan dlo a pou yo peche, Pyè di : Mèt, nou pase tout nuit la san nou pa pran anyen, men sou pawòl ou n ap jete filè a. Epi lè yo fin lage filè a nan dlo a, yo tèlman pran pwasyon, filè a ak krake pou l kase ». Nou wè, bon ja lafwa a chita sou Pawòl Kris la, « sou Pawòl ou », epi li poze aksyon ki mache ak sa l kwè a « M ap lage filè a nan dlo a », epi rezilta a vini « yo tèlman pran anpil pwason, filè t ap krake pou l kase ».
Si nou vle grandi tout bon nan relasyon nou ak Senyè a, si nou kwè li ka chanje lavi nou tout bon, se pou nou aji daprè sa li mande nou nan Pawòl li a. Lafwa se baz kwasans k ap mennen nou nan matirite spirityèl la, sonje se la Bondye ap tann nou.
Kounye a an n gade dezyèm mach la. Mete sou lafwa nou bon konduit.
- Bon konduit
Koneksyon ant 2 mach yo tou fèt. Paske si lafwa nou nan Kris la mande nou aji daprè sa ki nou kwè a, e aksyon n ap poze yo se bon aksyon yo ye pa vre ? Sa vle di, yo souzantann n ap gen yon bon konduit. Alòs, bon konduit la se sa ki montre tout bon nou gen lafwa nan Kris la. Nan Lik 3 : 9, Jezi di nou « Y ap koupe tout pyebwa ki pa bay bon fui ». Ou pa ka di ou kwè nan Kris epi pou w pa gen bon konduit. Jezi di disip yo nan Jan 14 :15 « Si nou renmen m vre, se pou nou fè tout sa m di nou fè yo ». William McDonald panse « bon konduit » la ka vle di kouraj spirityèl nou dwe genyen devan yon mond sovaj pou n toujou goumen pou bagay ki vre. Paske, gen anpil bagay n ap jwenn sou wout nou pandan nou nan pwosesis matirite spirityèl la ki ka vle fè nou gen vye konpòtman, se poutèt sa li di sa.
Se sa ki fè, Pyè ak Jan te reponn ansyen yo, doktè lalwa ak sakrifikatè yo nan Travay 4 : 19 « Mesye, èske nou wè l bon, devan Bondye, pou nou ta koute nou oubyen Bondye ? Gade byen nan pwòp konsyans nou pou n wè si sa nou di a fè sans ». Deklarasyon sa a fè n ap site definisyon William McDonald la ankò : « Bon konduit la se kouraj spirityèl nou dwe genyen devan mond sovaj sa a pou n toujou goumen pou bagay ki vre », nou ta ka ajoute « pou bagay ki mache ak lafwa nou.
N ap viv nan yon sosyete ki kòwonpi nèt, kote chak jou nou dwe fè chwa ki onore Bondye, sitou nan enstitisyon prive ak leta nou konn jwenn sitiyasyon ki ka tounen yon obstak pou kwasans spirityèl nou, apot Pyè di nou, aprè mach lafwa a, se sou mach bon konduit la nou dwe mete pye nou.
Mete sou bon konduit la konesans
- Konesans
Pandan nou gen bon konduit la, se pou nou gen bon jan konesans sou Pawòl Bondye a pou n pa tounen ni agoch ni adwat. Bib la konn sèvi ak mo konesans, « savoir » oubyen lasyans pou pale sou menm bagay. Men kòm n ap pale sou kwasans spirityèl, li enpòtan pou n mete aksan sou konesans Pawòl Bondye tankou yon metriz doktrin fondamantal fwa kretyèn nan epi pou n kontinye grandi ladan tou. Se konesans sa a k ap pèmèt nou fè fas kare ak fo dokttè yo tou, dayè se te youn nan objektif Pyè lè l t ap ekri a. An n gade tou, depi nan kòmansman epit la, ki jan Pyè montre se konesans la ki miltipliye gras ak lapè, sa vle di plis nou konnen Bondye ak Jezi Kris, se plis n ap devlope nan matirite spirityèl nou. Paske, mo ebre ki sèvi pou konesans la se « yada » li vle di yon konesans entim, sa vle di ou dwe konn Pawòl la jiskaske ou fè yon sèl ak li. Se menm mo « konnen » sa a ki sèvi pou pale sou relasyon seksyèl nou jwenn nan Jenèz 4 :1 lè l di « Adan konnen madanm li Èv epi li fè yon pitit ». Gen yon moun ki te di « Ou dwe tèlman fè yon sèl ak Pawòl Bondye a, si tout Bib nan mond la ta boule, depi yo gade w, yo dwe wè Pawòl la nan ou ».
Konesans n ap pale a gen yon kote li kòmanse. Pwov. 1 :7 di nou « lè w gen krentif pou Bondye se lè sa a nou kòmanse gen konesans », gade byen, li di « kòmanse » sa vle di nou dwe kontinye pratik la pou l ka devlope. Pòl se youn nan apot ki te gen pratik sa a, pandan l te nan prizon Wòm, li ekri Timote pou l di l lè w ap vin wè m, sonje pote rad ak liv mwen te kite Twowas kay Carpus (1 Tim. 4 : 13). Epi sonje se konesans Pawòl Bondye a k ap pèmèt nou konbat vye doktrin yo.
Apot Pyè te yon pechè pwason, jeneralman yo konsidere moun sa yo tankou moun ki sa edikasyon. Men aprè entèvansyon l devan chèf pèp yo, ansyen ak skrib yo nan Travay 4 : 13, yo te sezi, paske zotobre yo di : M te kwè nèg sa yo se moun pèp yo ye, nou pa konnen si yo te fòme kon sa. Aprè anviwon 3 lane ap pran fòmasayon nan men pi gwo Mèt ki genyen an, mesye yo pa t fouti sòt, yo te gen konesans Pawòl Bondye a.
N ap fè w sonje lè Satan te vin tante Jezi, se ak Pawòl la Senyè a te kouri dèyè l. An nou di ou avoka epi yon moun pote yon dosye byen monte pou w siyen pou li, se pou w gade èske sa w ap siyen an mache ak Pawòl Bondye a avan, pou anyen pa mare pye w nan kwasnas spirityèl ou. Si w pa manje Pawòl la pou w gen konesans, w ap kwatchòkò, nenpòt doktrin ka pote w ale.
Mete sou konesans la kontwòl tèt ou.
- Kontwòl tèt ou
Lè w fin gen konesans la, se pou w aprann kontwole tèt ou pou w pa panse se kichòy ou ye. Ki jan yo defini kontwòl tèt ou ? Se yon moderasyon ou genyen oubyen lè w kenbe tèt ou volontèman, se sa yo rele « Maîtrise de soi » nan lang franse a. Gen kèk lòt sous ki ajoute nosyon ekilib ladan, paske lè w gen kontwòt tèt ou, ou gen ekilib nan tout sa w ap fè.
Pòl ban nou yon avètisman jeneral konsènan konesans nan 1 Kor. 8 : 1 kote li di n atansyon ak konesans paske li ka fè n gongle lestomak nou. Se poutèt sa yo di kontwòt tèt nou an dwe pouse nou gen yon vi disiplin. Nan « Commentaire biblique Nouveau Testament du disciple », William McDonald defini disip la tankou yon pisans lè w kontwole volonte w pa mwayen Sentespri Bondye ki nan ou a. Li kontinye pou l di disiplin sa a dwe rantre nan tout sa w ap fè : lapriyè, etid biblik, nan fason ou jere tan w, nan kontwole apeti fizik ou, epi nan fason ou sakrifye tèt ou. Apot Pòl te gen bon jan disiplin sa a, koute sa li te di nan 1 Kor. 9 : 26,27a : « Se poutèt sa mwen pa kouri tankou chen fou, mwen gen yon kote m vle rive. Mwen batay tankou yon boksè. Mwen pa voye kout pwen nan vid. Wi, mwen trete kòm di pou m ka kenbe l anba bon jan kontwòl ».
Lè l te fenk kòmanse mache ak Jezi, Pyè se pa moun ki te poze, dayè yo konsidere l tankou apot ki gen san cho a, nou sonje se li menm ki te kouri rale epi pou l koupe zòrèy souvern sakrifikatè a nan jaden jetsemane (Jan 18 :10). Li pa t dakò pou yo arete Jezi, men kèk tan pita, li ta pral kite yo arete l san l pa fè rezistans, li vin aprann kontwole tèt li.
Pafwa yon moun di nou yon vye pawòl, nou sansi pou n ta santi nou byen sepou n ta reponn moun nan tèt pou tèt, men sonje nou dwe aprann kontwole tèt nou paske nou gen yon eskalye n ap monte ki pou mennen nou nan matirite spirityèl.
Mete sou kontwòl tèt ou, pasyans
- Pasyans
Lè w fin gen kontwòl tèt ou, ou pa nan tèt cho ankò, ou ka gen pasyans, senkyèm mach la. Li enpòtan pou n souliye mo « pasyans » la soti nan yon mo grèk ki vle di pèseverans. Sa vle di, pasyans pa vle di rete san w p ap fè anyen. Se pou w ap fè mouvman, gen rès mach ki rete pou w monte. Premye disip Jezi te rele yo te pwofesyonèl nan sa ki rele pasyans la, sa vle di nan pèseverans. Pou ki sa nou di sa ? Paske se pechè pwason yo te ye, pechè pwason konn pase twa jou sou lanmè san yo pa pran anyen, epi yo rantre lakay yo pou yo tounen nan demen ankò. Se sa ki rele pèseverans la.
Jak 1 : 3 di nou : « Lè lafwa nou rankontre eprèv, nou aprann gen pasyans nan soufrans yo ». Nou wè koneksyon ki genyen ant premye mach la ki se lafwa ak senkyèm nan ki se pasyans, sa vle di pèseverans. Jak kontinye nan chapit 5 : 7 pou l di nou dwe gen pasyans tankou moun k ap travay tè jiskaske Senyè a tounen. Nou wè ki jan ? Tankou moun k ap travay tè, alòs pasyans pa vle di rete ap tann san w pa fè anyen, men se pou w pèsevere jiskaske Senyè a tounen.
Alan Mafayden, yon fotograf pwofesyonèl te pase 6 lane pandan l te pran 720,000 priz imaj yon zwazo ki t ap plonje tèt li nan yon dlo avan l te resi reyisi grenn foto li te bezwen an. Se sa ki pèseverans la. Si nou ta di tankou Pòl, si pou yon bagay k ap pase moun prè pou pèsevere kon sa, ebyen konbyen fwa nou ta dwe fè plis efò pou n pèsevere nan bagay k ap mennen nou nan matirite spirityèl kote Bondye ap tann nou an.
Sa rive nou rantre lakay nou men nou tèlman fatige menm priye nou pa ka priye, menm Bib la nou pa ka li. Pwoblèm konn fè w panse pwomès Bondye yo pa mache ak reyalite w ap viv la, se nan moman sa yo menm nou dwe montre pasyans sa vle di pèseverans, se senkyèm mach la li ye, ou manke 3 pou w rive nan matirie spirityèl la, nou pa ka kanpe, se pou n leve pye nou mete sou sizyèm mach la.
Mete sou pasyans la devosyon oubyen sèvis nou pou Bondye.
- Devosyon
Devosyon se atachman ou genyen nan mach ou ak Senyè a pandan w ap sèvi l. Se sa ki fè li mache pye pou pye ak pasyans la ki se pèseverans. Li pèmèt nou respekte chwa Bondye fè pou l pase nou anba eprèv n ap pase nan pèseverans la. Chak grenn mach nan eskalye ki mennen nou nan matirite spirityèl la gen yon koneksyon.
Mo franse nou abitye ak li a se « piété », se pou sa Pòl di Timote egzèsis kòporèl la bon pou kèk bagay sèlman, men « piété » a bon pou tout bagay, paske devosyon sa a gen nan li menm yon pwomès lavi sou tè sa a ak sa ki gen pou vini an tou. (I Tim. 4 :8).
Pyè se youn nan apot ki te montre devosyon li te gen pou Senyè a. Li se premye disip ki te konfese Jezi se Kris la, Pitit Bondye vivan an ; se li menm ki t al chache pyès la nan bouch pwason an, se li ki te ale kay Kònèy epi prezante levanjil la bay payen yo. Devosyon sa a pouse l pran lapawòl nan jou pannkot la kote gen 3 mil moun ki te repanti.
Mwen ak ou dwe pase tèt nou egzamen pou n wè nan ki nivo devosyon nou pou Senyè a ye depi lè nou te mete pye nou sou premye mach lafwa a lè n te kwè nan li ak jounen jodi a. Devosyon w pou Senyè a se lè w vle temwaye pou li tout kote menm si sa dwe koute w pèdi travay ou.
Menm devosyon sa a dwe mennen nou nan lanmou pou frè ak sè nou, avan dènye mach matirite spirityèl la.
- Lanmou pou frè ak sè nou
Mo grèk ki sèvi pou lanmou frè ak sè a se « Philia », li sèvi pou amitye, yon lanmou ki montre atansyon ou genyen pou frè w ak sè w ki pouse w kontribye nan bonè yo. Li jwe yon wòl tranzisyon avan w tonbe nan dènye mach la ki gen plis egzijans. Se menm jan an, yon jwè foutbòl pa ka kouri monte yon teren pou l jwe si l te sou ban, san l pa kòmanse chofe, se yon fason pou l diminye risk pou l ta blese, nou pral konprann pi byen lè n rive nan dènye mach la. Lanmou pou frè ak sè a gen yon bon dòz tolerans ladan tou paske li fè nou akstepte yo pou moun yo ye a, nou prè pou n koute yo.
Ebre 13 : 1 pase nou lòd pou n pèsevere nan lanmou pou frè ak sè nou yo. Rezon pèseverans la se paske se pa yon bagay depi w genyen l yon fwa ou tou genyen l nèt, ou dwe toujou travay li anpil anpil jiskaske ou rive nan dènye mach la, li mande anpil egzèsis.
Pòl te montre kalite lanmou sa a pou Onezim pandan l t ap sipliye Filemon pou l resevwa onezim ki te fè l tò tankou yon frè nan Kris la. Pòl te menm di si l te pran kèk bagay pou ou, lè m vini m ap peye pou li.
Lanmou pou frè ak sè nou ap pouse nou pataje manje noua k yo, vizite yo lopital, pote yo sekou lè yo nan sitiyasyon difisil.
Mete sou lanmou pou frè ak sè nou yo lacharite, paske charite a ale pi lwen, li kouvri tout bagay nèt.
- Lacharite
Mo grèk pou lachirite a se « Agapê ». Se yon lanmou san enterè, yon lanmou ki soti nan Bondye, li san kondisyon. Se menm lanmou sa a Bondye gen pou limanite ki fè li bay grenn Pitit li a Jezi yon fason pou nenpòt moun ki mete konfyans nan li va gen lavi ki p ap janm fini an (Jan 3 :16). Nan 1 Korentyen 13, Pòl fè yon deskripsyon sou lanmou san parèy sa a. Nou pral li yon pati nan tèks sa a pandan n ap souliye lacharite a se dènye mach pou n rive nan matirite spirityèl la: « Menm si mwen ta pale anpil lang moun pale sou latè, menm si mwen ta rive pale lang zanj yo, si m pa gen lacharite, sa vle di si m pa rive nan dènye mach matirite spirityèl la, mwen tankou yon gwo klòch k ap sonnen, tankou yon senbal k ap fè bri. Menm si m ta gen don pwofesi, menm si m ta rive konprann tout ti sekrè nan plan Bondye, menm si m ta gen yon konesans ki pa gen limit, epi m ta gen yon lafwa ki ka deplase montay yo, si mwen pa gen lacharite, sa vle di si m pa rive nan dènye mach matirite spirityèl la, mwen pa anyen. Menm si m ta bay pòv tout sa m posede, menm si m ta ofri kò m pou yo boule, si m pa gen lacharite, sa vle di si m pa rive nan dènye mach matirite spirityèl la, sa p ap sèvi m anyen. Pou ki sa ? Ebyen se paske charite a, sa vle di dènye mach matirite spirityèl la, li gen pasyans ak mizèrikòd, li pa jalou, li pa vante tèt li, li pa gonfle ak ògèy. Li pa brital ni li pa egoyis. Lacharite paf ache fasil, li pa kenbe yon lis bagay mal moun fè l. Lacharite pa janm kontan lè gen lenjistis, men li toujou kontan lè verite a parèt klè. Lacharite aksepte tout bagay ak pasyans, li pa janm pèdi espwa, li pa janm abandone. Ebyen se la Bondye ap tann nou, pou n gen tout deskripsyon sa yo nan nous an manke moso.
Apot Pyè te pase anpil wout avan l te rive nan dènye mach la. Menm aprè rezireksyon Jezi, Pyè potko rive. Paske nan Jan 21 vèsè 15-17 nan tèks grèk la, nou pi byen konprann sa k ap pase a. Paske premye fwa Jezi di Pyè èske w renmen m, li sèvi ak vèb agâpe, li di : Pyè, Agapas me ? Sa vle di èske w renmen m san kondisyon nan pwen pou w mouri pou mwen, paske se sa Agapê a vle di, men Pyè reponn : Senyè, fileyo se, sa vle di, m renmen w vre, men se nan lanmou frè ak sè a m ye toujou, se nan 7èm mach la m ye, m poko rive nan dènye a. Yon dezyèm fwa, Jezi di : Pyè, agapas me ? Sa vle di èske w renmen m san kondisyon nan pwen pou w mouri pou mwen, men Pyè reponn : Senyè, fileyo se, sa vle di, m renmen w vre, men se nan lanmou frè ak sè a m ye toujou. Lè Jezi poze Pyè kesyon an pou twazyèm fwa, li pa poze l ak Agapê a, men pito li sèvi ak menm vèb Pyè sèvi a, sa vle di li desann vin jwenn Pyè nan 7èm mach la, li di : Pyè : fileyis me ? sa vle di èske ou gen lanmou frè ak sè a pou mwen jan w di a ? Pyè di : Senyè ou konn tout bagay, fileyo se, sa vle di wi, se lanmou sa a m gen pou ou, m pa ka ba w manti. Men èske Pyè te rete la ? Non, paske yo arete l nan Travay 4, yo di pou l pa pale sou Jezi, Pyè di li pa ka pa pale sa l wè ak sa l tande, paske se Bondye l ap obeyi. Pyè vin prè kounye a pou l mouri pou Senyè a, dayè yo te krisifye Pyè sou yon kwa tèt anba li te di m pa diy pou m mouri menm jan ak mèt mwen, mete m tèt anba. Wi, Pyè te rive nan dènye mach matirite spirityèl la, paske li pa t ap viv pou li ankò, li te prè pou l mouri pou Mèt la.
McCully te papa Ed McCully, youn nan misyonè Aucas yo te touye nan peyi ekwatè. Yon jou swa pandan yon ekip moun t ap priye, yo te tande l ap priye kon sa : « Senyè, kite m viv ase lontan pou m Endyen sa yo sove, yo menm ki te touye pitit mwen an, pou m ka pase men nan kou yo pou m di yo mwen renmen yo paske yo renmen Sovè m nan Jezi Kris… ».
DÈNYE KOZE
Mete sou lafwa nou bon konduit la se sa ki montre tout bon nou gen lafwa nan Kris la ; Pandan nou gen bon konduit la, se pou nou gen bon jan konesans sou Pawòl Bondye a pou n pa tounen ni agoch ni adwat ; Lè w fin gen konesans la, se pou w aprann kontwole tèt ou pou w pa panse se kichòy ou ye ; Lè w fin gen kontwòl tèt ou, ou pa nan tèt cho ankò, ou ka gen pasyans, senkyèm mach la ; Devosyon se atachman ou genyen nan mach ou ak Senyè a pandan w ap sèvi l. Se sa ki fè li mache pye pou pye ak pasyans la ki se pèseverans ; Menm devosyon sa a dwe mennen nou nan lanmou pou frè ak sè nou, avan dènye mach matirite spirityèl la ; Mete sou lanmou pou frè ak sè nou yo lacharite paske charite a ale pi lwen, li kouvri tout bagay nèt.
Men ki jan Papa Tom Olson te konn abitye li pasaj jodi a pou pitit li : « Mete sou lafwa w bon konduit oubyen kouraj David la ; sou kouraj David la, mete konesans Salomon an; sou konesans Salomon an, mete pasyans Jòb la ; sou pasyans Jòb la mete devosyon Danyèl la, sou devosyon Danyèl la, mete amitye fratènèl Jonatan an; sou amitye fratènèl Jonathan an, mete lanmou Jan an. ».
N ap fini pou n di lanmou se rezilta yon vi kwasans, se ak lafwa li kòmanse.
Pyè di nou nan vèsè 8 tèks jodi a egzèsis sa a p ap kite nou rete 2 bra kwaze pou n pa ta grandi nan konesans nou nan Kris la. Li di si se sa, konnen n ap avèg spirityèlman, paske pou w monte mach yo fòk zye w louvri epi pou limyè Pawòl Bondye a ap klere chak mach pou ou.
Efezyen 4 : 13 konfime yon lòt fwa objektif li gen pou nou pa mwayen apot Pòl, koute sa li di : « Travay sa a dwe kontinye jouk nou ini ansanm nan sa nou kwè ak nan konesans nou konsènan Pitit Bondye a. Objektif nou, se pou nou vin tankou kò yon moun ki byen grandi, byen devlope, nou nou vin sanble ak Kris la nan tout sans ».
Se pou Bondye fè nou gras pou n konprann epi pratike pawòl li, amèn !
-
Lanmò Kris la ban nou yon delivrans total Kapital
Sèl lanmò Kris la delivre kò nou, nanm nou ak lespri nou. Jezi te mouri pou chak dimansyon nan lèzòm pou l te ka ban nou yon delivrans total kapital.
-
Fason Bondye vle nou bay
II Korentyen 9 : 7
« Se pou chak moun bay jan yo te deside nan kè yo, san moun pa fòse yo, san tristès, paske Bondye renmen moun ki bay ak kè kontan ».
Tit : « Bay pa sifi ».
Men ki sa Vòltè te di : « Relijyon an se yon kote yon bann mèddam reyini ki chaje enbesil k ap suiv yo ». Vòltè te gade sou yon pakèt vye pratik ki te gen nan legliz mwayenaj, nan 17èm syèk la kote responsab yo te konn ap vann sa yo rele endiljans la. Sa vle di ou te ka achte padon pou peche w ak lajan. Legliz nan epòk la te konn anseye ofrann nan se te yon mwayen pou retire yon nanm ki nan lanfè pou w fè l ale nan pigatwa, epi lè l soti nan pigatwa li ka ale nan paradi. Relijyon te mete yon pratik ki fè moun yo tankou bèt, yo te tounen zonbi nèt, tèlman yo te egare. Jounen jodi a, lè n ap gade ki jan anpil legliz chwazi pou fè ofrann, nou mande tèt nou èske l diferan ak jan yo te konn vann padon pou peche nan tan lontan jan nou sot di a ? Gen kèk lidè ki pwofite inyorans pèp Bondye a pou pouse yo bay sa yo pa posede. Genyen ki konn menm menase fidèl yo nan mande yo vide bous, valiz, pòch yo nan kòbèy ofrann la. Yo manipile moun yo san yo pa wont, yo sèvi ak inyorans moun yo pou yo mennen yo kote yo vle, pou yo fè yo aji kont volonte yo. Mete sou sa, yo kreye yon imaj Bondye nan lespri moun yo kote yo fè Bondye tounen yon koperativ, si w mete 10 pousan nan bank Bondye a, l ap ba w 100 pousan enterè. Nan nivo sa a, ofrann la pèdi tout sans li, li pa ofrann ankò, li tounen yon envestisman, « ban m m ap ba w », yo devlope rapò sa ak Bondye nan tout bagay, lè w ap chante yo di « Men louwanj ou ban m delivrans mwen nan pla men m », yo redui siyifikasyon ofrann la tankou yon komès relijye kote y ap pledi di plis ou bay se plis w ap beni, oubyen longè ofrann ou se longè benediksyon w.
Koute byen, tout sa w ap fòse fouye nan tèt yon moun ki pa mache ak verite biblik la ap gen yon enpak sikolojik sou moun nan kanmèm paske se sou baz yon vye ideyoloji sa w ap fòse a kanpe.
Tewolojyen epi jesyonè kontab Faldor Jean Rony kalifye pwoblèm “eco-tewolojik”, sa vle di li gen rapò ak yon pwoblèm tewoloji enviwònman», paske daprè li menm, dirijan sa yo pa konnen kretyen yo dwe gen yon bon relasyon ak anviwònman yo, nan sans, yo pa ta dwe yon menas oubyen predatè pou fidèl yo, men yon gid pou di yo ki atitid yo ta dwe genyen nan tout sikonsans sitou anndan legliz la. Feblès sa fè yo vale yon tewoloji pwosperite san yo pa konnen ni sa l ye ni nan ki kontèks li te pran nesans epi grandi. »
Ki sa Bib la di nou sou sa ? Pwoblèm lakòlèt sa a oubyen ofrann nan se te youn nan kastèt chinwa Pòl te gen pou l rezoud nan dezyèm lèt li te ekri pou Korentyen yo. Ki sa Senyè a vle nou konnen sou konpòtman nou dwe genyen lè nou ap pote ofrann pou li nan prezans li ? Èske nou dwe santi nou deranje pandan n ap bay ofrann nan ? Koute byen « Bondye plis enterese nan fason w ap bay la pase sa w ap bay la. Wi, Bondye plis enterese nan fason w ap bay la pase sa w ap bay la. » Tèks nou li jodi a ban nou twa verite nou pral gade kounye a : Ou pa dwe bay yon ofrann nan fòse ; Ou pa dwe bay ofrann nan tristès ; Ou dwe bay yon ofrann ak kè kontan, oubyen ak lajwa. Ann konsidere yo youn aprè lòt frè m ak sè m yo.
- Ou pa dwe bay yon ofrann nan fòse (II Kor. 9 : 7)
Mo fòse an kreyòl la, se li menm nou jwenn pou tradiksyon nan plizyè tradiksyon franse nou abitye ak yo ki se « kontrent » la. Nan yon fason jeneral, yo defini kontrent la tankou yon vyolans ou fè sou yon moun, se sa ki fòse a ; se lè w anpeche yon moun aji ak pwòp libète pa l. Kontrent sa a ka soti deyò, sa vle di kote yon lòt moun oubyen yon lòt bagay, oubyen li ka soti anndan moun nan menm. Lè nou di anndan moun nan, li ka yon baryè sikolijik, sa vle di moun nan gen yon bagay nan li ki jennen l epi anpeche l aji jan l ta swete a. Nan kèk domèn, yo konn pale sou baryè kiltirèl, sa vle di peyi oubyen kilti kote moun nan ap viv la konn anpeche l aji nan yon fason oubyen yon lòt, yo pale tou sou baryè sosyal, moral epi fizik. Nan sa ki gen pou wè ak tèks n ap gade jodi a, kontrent la se lè ou fòse yon moun bay yon ofrann san l pa t gen volonte pou l te fè sa. Yo konn fè sa yo rele vyolans vèbal sou moun yo, sa vle di ak pawòl k ap soti nan bouch yo, yo pouse moun nan depoze yon ofrann nan kòbèy la li pa t vle bay. Se definisyon sa a ki bay mo « regrèt » la tout sans li, paske men ki sa regrèt la vle di : « Se lè ou chagren, se lè ou repanti pou yon bagay ou te fè oubyen ou pa t fè. Nan sans sa a, li nòmal pou w regrèt ou te bay yon ofrann si se fòse yo te fòse w bay ofrann sa a.
Anpil moun mal konprann epizòd Abraram ak sakrifis pitit li Izarak li ta pral bay Bondye a, yo di se yon ofrann li ta pral fè anba gwo kontrent paske pa gen yon papa ki t ap dakò touye yon pitit li renmen anpil san sa pa deranje l. An nou gade nan Jenèz 22 lide k ap soti nan istwa sa a, vèsè 2 : « Bondye di Abraram : Pran grenn pitit gasou ou genyen an, sa w renmen anpil la, Izarak, ale nan peyi Morija, lè w rive la, w ap touye l epi w ap boule l nèt pou mwen sou youn nan montay mwen va di w yo ». Sa nou di ? Ki paran zantray la pa t ap rache lè l tande yon pawòl kon sa ? Donk, moun ki di se te yon ofrann ki te gen gwo kontrent ladan l sanble gen rezon, men atansyon, vèsè premye nan menm chapit la retire tout dout, koute sa l di : « Aprè tout bagay sa yo, Bondye sonde Abraram epi li di l : Abraram ! Epi Abraram reponn : Mwen mwen !» Bondye sonde Abraram. Gen tradiksyon ki di « Aprè bagay sa yo, Bondye pase Abraram yon tès », alòs, sa pa gen rapò ditou ak yon ofrann anba kontrent, men pito Bondye t ap pase lafwa Abraram anba eprèv, se te objektif egzèsis la. Dayè, mo ebre ki nan tèks orijinal la se « Nisah », ki vle di « epwouve » oubyen « fè yon moun pase yon eprèv oubyen yon egzamen ». Anplis Bondye te vle bay Abraram yon leson, men li te vle anseye nou yon bagay tou sou sakrifis Kris la ki te gen pou l vini, paske Morija, kote Bondye te di Abraram ale pou ofri grenn pitit li a an sakrifis, se menm kote sa a ki ta pral vin tounen Mòn Kalvè pita nan 2 Kwon. 31, mòm kalvè, kote Bondye ta pral ofri grenn Pitit li a an sakrifis. Bondye t ap teste lafwa Abraram, se pa t yon sakrifis anba kontrent, se pa t yon sakrifis ki te gen gou regrèt ladan. Dayè, pou montre w tèlman se te yon tès, Bondye te gen tan prepare yon belye pou pran plas Izarak, se la nou jwenn non « Yaweh Jireh », « le Dieu qui pourvoit »Bondye pwovizyon an. Sa enteresan pou n wè menm Bondye ki mande nou ofrann nan, se li menm ankò ki ban moun mwayen pou n ba l ofrann nan.
M gen yon zanmi ki rakonte m istwa yon jèn fi ki ale nan yon sèvis nan yon legliz yon jou nan semèn nan, epi pandan y ap fè ofrann, pastè a ap fòse moun yo depoze tout kòb yo gen sou yo nan kòbèy la menm lajan pou yo pran machin pou yo tounen lakay yo. Lè yo fenk kòmanse li t ap ezite, men lè l wè jan pastè a ap fòse moun yo, li leve depoze kòb yon lane inivèsite nan kòbèy la ak yon kè sere, yon kòb li te dwe al bay nan inivèsite a menm jou a, yon bò frè l ki te ba l kòb la pou l ale peye. M panse nou dwe rele yon chat, yon chat, sa rele vòlè. Se sa ki rele kontrent la, lè w fòse moun nan bay, lè sa a l ap regrèt kanmèm.
Frè ak sè m yo, si w santi lespri w pa dispoze pou bay, si yon moun ap fòse w vide pòch ou, bous ak valiz ou, se pou w reziste paske menm lè w ta bay tout sa w gen sou ou, Bondye p ap pran plezi nan ofrann nan paske se atitid ou Bondye ap chache, se dispozisyon kè moun k ap bay la ki enterese Bondye avan tout bagay. Sa vle di, avan w pote ofrann nan, se kè w ou dwe ofri bay Bondye. Nou menm dirijan, sispann fè vyolans sou pèp Bondye a, sispann fòse yo bay, nou se premye gwoup moun ki dwe respekte sa ki ekri nan Pawòl Bondye : Jan moun nan te deside nan kè l, san fòse, oubyen san kontrent.
Tèks la pa kanpe la, paske anplis li di ou pa dwe bay yon ofrann nan fòse epi pou w regrèt, oubyen anba kontrent, li di tou, ou pa dwe bay yon ofrann nan tristès.
- Ou pa dwe bay yon ofrann la nan tristès (II Kor. 9 : 7)
Gade ki jan yo defini tristès : « Yon fason ou santi w ki twouble emosyon w epi ki dire ; yon doulè ki anvayi konsyans ou epi ki anpeche w pwofite bagay ki ta dwe fè w kontan a ». Nou tande byen ? Yon fason ou santi w ki twouble emosyon w epi ki dire», onètman m panse nou te ka kanpe la paske definisyon an di tout bagay. Èske se ak yon santiman latwoublay nou dwe prezante nou devan Bondye lè n ap pote ofrann pou li ? Se santiman latwoublay sa a jenòm rich ki te mande Jezi ki sa pou l fè pou l gen lavi etènèl la te genyen. Jezi te reponn li : « Ou pa dwe touye ; Ou pa dwe fè adiltè ; Ou pa dwe bay manti ; onore papa w ak manman w ; epi se pou w renmen pwochen w menm jan ak tèt ou ». Jenòm nan te di Jezi : « Mwen fè tout bagay sa yo deja, ki sa m dwe fè ankò ? Jezi di l : « Si w vle san defo nèt, ale epi vann tout sa w posede, epi bay pòv yo, epi ou va gen yon trezò nan syèl la. Aprè sa, tounen epi suiv mwen. » Men pati ki enterese nou an : « Lè l fin tande tout pawòl sa yo, jenòm nan ale tou tris, paske li te gen anpil byen ». Nou jwenn istwa sa a nan Matye chapit 19 vèsè 16 a 22. Li te panike lè l tande li dwe al vann tout byen l yo, yon santiman latwoublay te pran l, e se definisyon tristès la menm, se kon sa anndan nou ye lè n ap ofri Bondye yon bagay nan tristès. Jan Bib la aprann nou l, Bondye pa pran plezi nan kalite ofrann sa yo, se atitid la l ap chache avan.
Istwa Kayen ak Abèl la ka ban nou yon limyè anplis sou sa n ap pale a, paske li montre nou atitid 2 frè ki t ap prezante ofrann yo bay Bondye. Jenèz 4 : 4b à 7 : « Letènèl te kontan ak Abèl epi li te aksepte ofrann li an, men li pa t kontan ak Kayen epi li pa t aksepte ofrann li an. Lè Kayen wè sa, li te move anpil, li mare figi l byen mare. Letènèl di Kayen : « Pou ki sa ou move kon sa ? Pou ki sa ou mare figi w kon sa ? Koute rezon ki fè Bondye pa t aksepte ofrann nan daprè vèsè 7 la : « Pa gen dout nan sa, si sa w te fè a te byen, ou pa t ap rive nan sitiyasyon sa a, men paske ou fè sa ki mal, peche a kouche nan papòt ou, l ap tann lè pou l pran tèt ou. Men ou menm, se pou w kenbe tèt ak li. » Gen moun ki di tèks la pa fin klè nèt sou rezon ki fè Bondye pa t aksepte ofrann Kayen an, kèlkeswa rezon an, Kayen pa t anpè avèk tèt li avan l te prezante ofrann nan, pa t anpè a vle di li gen yon santiman latwoublay. Sa pa gen anyen pou wè ak ofrann li te bay la ki se fui latè, chak moun te gen metye pa yo, Kayen se latè li te konn travay. Nan liv Penntatek yo, nou wè plizyè kote Bondye te konn aksepte pèp ofrann fui latè nan men pèp li a. Men tèks la di nou Kayen te mare figi l byen mare, nanm li pa t anpè, li te tris kanmèm. Se atitid li te genyen an ki fè Bondye pa t aksepte ofrann li an. Yon lòt fwa ankò, Bib la montre nou aklè atitid moun k ap bay ofrann nan vin avan ofrann la nan li menm.
Gen moun ki mal sèvi ak egzanp David la nan echanj li te genyen ak Ònan an lè l te vle achte chan an pou l bati yon otèl pou l fè sakrifis pou Bondye. Yo sèvi ak pasaj sa a pou di lè w ap ofri Bondye yon bagay fòk li deranje w, fòk li fè w mal, mo yo sèvi yo gen menm sans ak « fòk li ba w yon santiman latwoublay », sa vle di yon doulè ki anvayi konsyans ou epi ki anpeche w pwofite bagay ki ta dwe fè w kontan ». Ònan te di wa a l ap fè l kado, men David te reponn : Non ! Mwen vle achte l ak lajan nan men, mwen p ap ofri Senyè a yon bagay ki pou ou, epi mwen p ap ofri yon sakrifis boule bay Senyè a ki pa koute m anyen ». I Kwonik 21 : 24.
Atansyon ! Atansyon ! Aksyon David te poze a pa t vle di ofrann la te deranje l oubyen li te kite yon santiman latwoublay nan li menm, rezon an se paske anplis se te desizyon pèsonèl David pou l te achte l ak lajan men tou, David se wa li te ye, li te gen mwayen pou l achte cham an san sa pa t deranje l, sa vle di se ak bon volonte l li te fè l, daprè jan nou te li l nan tèks jodi a : jan li te deside sa nan kè l ».
Frè ak sè m yo, si nou gen 100 goud nan pòch nou, epi nou santi nou tris pandan n ap depoze l nan kòbèy la nan moman ofrann la, kenbe lajan w nan pòch ou, Bondye pa pran plezi nan sa. Menm yon zanmi ou vle fè yon kado si w santi tristès nan kè w, kenbe kado w lakay ou, paske tèks la klè devan nou : « ….se pou w bay san tristès, jan ou te deside fè sa nan kè w ».
Ou pa dwe bay yon ofrann nan fòse epi pou w regrèt, ou pa dwe bay yon ofrann nan tristès, men ou dwe bay yon ofrann nan kè kontan, oubyen nan lajwa.
- Ou dwe bay ofrann la nan kè kontan oubyen nan lajwa (II Kor. 9 : 7)
Yo defini « kè kontan » an tankou yon bon emosyon ou genyen ki soti anndan fon kè w, yon santiman tout konsyans ou santi. Toujou daprè definisyon sa a, emosyon sa a mache ak yon bagay, sa vle di gen yon rezon ki ba w kè kontan sa a. Si se kon sa, kè kontan nou genyen an se yon manifestasyon rekonesans pou sa Bondye fè pou nou. Nou prezante ofrann nou yo bay Bondye paske nou renmen li, paske li ban nou tout sa nou bezwen avan menm nou mande l yo. Li enteresan pou n gade tou « kè kontan » n ap pale a oubyen « lajwa » se fui Lespri a li ye, nou jwenn li nan Galat 2 :20 : « Fui Lespri a se kè kontan….. ». Sa fè nou konprann moun k ap prezante ofrann nan dwe fè l selon Lespri, epi kèlkeswa kote Lespri Senyè a ye gen kè kontan, alòs, se yon ofrann ki jwenn enspirasyon l nan Sentespri nou dwe pote bay Bondye, li soti anndan fon kè nou, li pa gen limit. Sentespri vle mete nou nan bon kondisyon emosyonèl, sikolojik ak spirityèl pou n prezante ofrann nou devan Bondye.
Lè nou gen kè kontan, nou bay san gade dèyè, nou bay ak liberalite, e se menm liberalite sa a k ap fè nou rich, se sa menm nou jwenn nan Pwovèb 11 :24 : « Moun ki bay san gade dèyè ap vin pi rich ».
Jezi t ap pale sou pòv vèv ki te bay 2 ti pyès yo, li te di fanm sa a te bay plis pase tout lòt moun ki t ap mete nan bwat la ; paske yo menm yo te bay nan sa yo pa bezwen ankò, men vèv la te bay sa l te genyen pou l te viv, tout sa l te posede. (Mak 12 : 42-44). « Tout sa l te posede » se sa liberalite a ye, e pa gen liberalite san kè kontan, se kè kontan an menm k ap fè w baya k liberalite, sa vle di san gade dèyè. Men atansyon ! Jezi pa vle di liberalite a se lè w bay tout sa w genyen epi ou pa kite anyen pou w viv, men pito, li t ap anseye disip yo epi nou menm sou ki atitid nou dwe genyen lè n ap bay, paske li di « lòt moun yo bay nan sa yo gen anplis, nan bagay yo pa bezwen », poutan vèv la te bay tout sa l te genyen, sa ki te nesesè pou l viv, alòs bon jan ofrann nan se lè w ba w san w pa fèmen kè w, san w pa mezire, se lè ou bay tout ou menm san rezèv. Pandan n ap pale sou « bay tout ou menm » nan, koute sa Pòl te di sou legliz ki te nan Masedwàn yo : « Frè m yo, mwen ta renmen fè nou konnen jan Bondye te montre favè l nan legliz Masedwàn yo. Nan mitan gwo tribilasyon ki te pase yo anba eprèv, malgre yo pa t genyen, kè kontan yo a te fè yo bay san gade dèyè. Sa m ap di nou la se vre, yo bay tout sa yo te kapab, yo menm rive bay sa yo pa menm genyen san moun pa fòse yo, pandan y ap fè sa, y ap plede ak nou pou n aksepte paske yo di se yon privilèj yo genyen pou patisipe nan sekou y ap voye pou manm pèp Bondye a ki nan peyi Jide. Anplis yo bay jan nou te swete l la, yo ofri pwòp tèt yo bay Senyè a avan, aprè sa yo ofri tèt yo ban nou tou jan Bondye vle l la ». II Kor. 8 : 1-5. Ki sa pou n di ankò ? Se sa vrè ofrann la ye menm.
Bay ak kè kontan sanble ak yon timoun ki gen yon bèl mango byen jòn nan men l pou l manje, epi li wè papa l k ap vini byen lwen nan yon vwayaj li te pase plizyè jou deyò. Li tèlman kontan paske li pral pase tan ak papa l, li bliye si l grangou epi li lonje mango a bay papa l pou l montre l jan l kontan. Se menm jan an tou, lè nou nan prezans Senyè a, kè kontan nou jwenn nan pouse nou ofri l sa nou genyen ki pi bon an san fòse, nan lajwa.
Mwen konnen li pa fasil pou n jwenn anpil legliz jounen jodi a nan kote n ap viv la kote moun yo bay ofrann ki pa lajan, men kite m di nou, si se yon chan bannann ou genyen epi w santi nesesite pou w pote yon rejim kòm ofrann pou Bondye, fè sa san ezite, pa okipe moun, sa regade ou menm ak Senyè w la sèlman. Si w vle vann li tou pou w pote kòb la vini, pa gen pwoblèm, men sonje ou dwe fè sa nan kè kontan, pa okipe ipokrizi pèsòn aji sou ofrann ou an.
DÈNYE KOZE
Bon jan ofrann la se lè nou bay san nou pa regrèt la, san yo pa fòse nou ; Bon jan ofrann ofrann la se lè nou bay san tristès ; Bon jan ofrann la se lè nou baya k kè kontan, oubyen nan lajwa. Verite sa a dwe rantre anndan fon kè nou si n vle evite fè kòve. Paske anpil fwa ofrann nou yo sanble ak kakav ki byen abitye men yo pa gen souf nan yo, se diferans sa a menm ki gen ant yon moun k ap viv ak yon moun ki mouri « souf la ». Si nou pa bay ofrann nou yo ak kè kontan, yo p ap gen « souf nan » yo tou, sa vle di yo p ap vivan devan Senyè a.
Bib la ban nou yon egzanp sou yon koupe ki te prezante ofrann ni ak regrè epi nan tristès tou. Aprè yo te fin vann yon teren, Ananyas ak Safira te bay manti paske yo te kenbe yon pati nan lajan an pou yo epi yo di se tout lajan an yo te pote. Petèt se paske yo te wè lajan an te twò bèl devan je yo, oubyen yo te vle fè wè. Poutan, yo te lib pou yo te bay kantite yo vle e pèsòn pa t ap di yo anyen, daprè sa Pyè te di yo nan Travay chapit 5. Yo te regrèt lajan an. Menm jan yo te ofri yon ofrann kadav, sa vle di kip a t gen kè kontan ladan, kò yo te tonbe sans ouf devan apot yo tou. Se ak sa ofrann nou yo sanble lè nou pa bay yo ak kè kontan, yo sanble ak kadav devan Bondye. Ki sa pou Senyè a fè ak yon kadav ? Se pa kwòk mò li ye.
Pi gwo ofrann nou ka bay Bondye se lavi nèt, san manke moso. Si vi nou pa vo anyen pou nou nan pwen pou nou bay Bondye tout, ki sa nou p ap ba li ? Nou konnen ki jan nou sansib pou lavi nou. Lè nou ba l lavi nou nan kè kontan, li gen yon fason li resevwa pafen ofrann sa a devan twòn li. Ou menm ki poko resevwa Jezi nan lavi w, pi gwo ofrann ou ka ba li se lavi w kòm repons pou sakrifis li te fè pou ou sou kwa a, li ba w garanti ofrann sa ap gen yon bon sant nan prezans li pou tout letènite. Men sonje, kèlkeswa sa w ap bay la se pou w bay li ak kè kontan, paske kè kontan an se luil ki sou ofrann nan k ap rale dife Sentespri pou boule ofrann nan, sa ki montre Bondye aksepte l. Se pou Bondye fè nou gras pou n konprann epi pratike pawòl li, amèn !
-
E si Neyemi te yon Ayisyen
Se avèk anpil tristès pou m tande moun k ap pran pretèks pou di : Si kretyen pa t ap priye sa t ap pi mal, nou serye ? Ki jan pou sa te pi mal lè yo ka rantre lakay ou yo vyole pitit fi w, madanm ou devan w, touye yo epi mechan yo ale san kè sote ?